“Desde Quintes a Quintueles”
Otru añu más estos dos pueblos
mariñanes, que se cueyen les manes penriba´l Regatón y que mueyen los pies
xuntos nel mar Cantábricu, extienden el mantel de la hospitalidá y ufiértente
una fiesta que va durar del ----. Si recueyes el brinde, nun habrá de pesate.
Desde Quintes a Quintules, prometemos trátate a cuerpu de rey.
A pocu qu´eches una güeyada al
programa, vas ver que procuremos iguar les coses de mou y manera que se
fartuquen por igual cuerpu y espíritu, porque les dos coses son pernecesaries
pal llogru de la felicidá. Fartura y cultura nun son incompatibles, sinón
complementaries.
Nestos dies de fiesta, allégate
ensin priesa a cualquier de los dos pueblos (si ye a los dos, munchu meyor) y
apárate a gozar del maravillosu paisaxe que s´enancha por tola rasa hasta la
mar, agora que la primavera tien los praos y los árboles acabantes de pintar.
Baxa, si tienes tiempu, a una de les dos playes – son a cuala más prestosa, nun
te pesará – a enllenar d´arume y yodu los pulmones y a esparder la mirada por
un lugar tan guapu.
En llegando la hora de comer,
escueye sitiu (si non lu tienes acutáu) entre los restaurantes que participen
na fiesta. Enfótate nellos defechu, porque tol mundo ta empeñau en quedar bien
y esos dies hai más concentración nes cocines qu´en Cabu Cañaveral. Arriendes,
nes cocines de toles cases mariñanes – y nun digamos nada de los chigres – hai
muncha sabencia pa iguar les coses de la mar.
Tolo que pidas va tar rico, asina
escueyes dalgún platu tradicional o eses otres recetes un poquiñin más
novedoses pa xente más atrevia, porque´l cariñu col que se fai ye de tan bona
calidá comu la materia prima.
La llámpara ye la reina d´esta
fiesta, la que se pon enriba´l mantel pa que la disfrutemos, tan sabrosa como
desconocia, compendiu de tolos sabores de la mar y simbolu destos pueblos de la
marina.
Si vienes al Festival de la
Llámpara vas a pasar un día inolvidable.
José M. Valdés Costales (Texto publicado en el libro de las Jornadas de 1997)
